Bilik Fondu Telli Pənahqızının gənc jurnalistlərlə “İmzalı görüşü”nü keçirib


Azərbaycan Respublikasının Prezidenti yanında Bilik Fondunun “Mədəni maarifləndirmə” proqramı çərçivəsində keçirdiyi növbəti “İmzalı görüş”ü AMEA-nın Mərkəzi Elmi Kitabxanasında baş tutub.
 
Əməkdar telejurnalist, yazıçı-publisist Telli Pənahqızı ilə Bilik Fondunun “Kinolkub”, “Gənc jurnalistlər” klublarının və “Mizan” Tələbə Dram Dərnəyinin üzvləri görüşüblər.
 
Tədbiri Fondun aparıcı məsləhətçisi Ramilə Qurbanlı açaraq, bugünə qədər “İmzalı görüş” layihəsinə cəlb olunan yazıçı və şairlərin oxucularla mütəmadi görüşlər təşkil edildiyini diqqətə çatdırıb, belə tədbirlərin gənclərin mədəni səviyyədə maariflənməsinə töhfə verdiyini bildirib.
 
Tədbirdə iştirak edən Bilik Fondunun icraçı direktoru Oktay Səmədov özünün də bir oxucu kimi Telli Pənahqızının görüşünə gəldiyini diqqətə çatdıraraq, xanım yazarın qələm nümunəsi olan publisistik yazıların, şeirlərin insanda xoş duyğular yaratdığını, vətənə, xalqa, insana sevgi aşıladığını vurğulayıb.
 
Sənətşünas Əsəd Cahangir Telli xanımın yaradıcılığından söhbət açıb. Onun jurnalistika fəaliyyətindən və poetik əsərlərindəki fəlsəfədən danışıb.
 
Qocaman telejurnalist Rafiq Savalan Telli xanımın imzasıyla ərsəyə gələn hər bir yaradıcılıq işinin yüksək səviyyədə olduğunu, jurnalistikada peşəkar və nümunəvi davranışı ilə yaddaşlarda dərin iz buraxdığını söyləyib.
 
“Kinoklub”un üzvü, Azərbaycan Dövlət Mədəniyyət və İncəsənət Universitetinin tələbəsi Röyal Allahverdiyev şairin “Yaddaşım qaval daşı” kitabından, BSU-nun Məktəb-Lisey Kompleksinin 5-ci sinif şagirdləri Banu Məmmədli, Xədicə Heydərova, Firuzə Qasımzadə digər kitablarından şeirlər söyləyiblər.
 
Sonda müəllif tələbələrin suallarını cavablandırıb, kitablarını imzalayaraq onlara hədiyyə edib.
 
Azərbaycan Respublikasının Prezidenti yanında
Bilik Fondunun Mətbuat xidməti
Tarix: 30.11.2018

Son xəbərlər